«Ишеним» фракциясынын лидери Улугбек Ормонов 5-6-апрелде Америка Кошмо Штаттарынын Цинциннати шаарынын Огайо штатынын аймагында өткөн Кыргыз күрөшү боюнча тарыхтагы биринчи ачык чемпиондугуна арадактуу конок катары катышты. Бул тууралуу аталган фракциядан билдиришти.
Иш-чаранын ачылыш аземинде Улугбек Ормонов куттуктоо сөзүн айтып, ата-бабаларыбыздын мурасы болгон жана миң жылдык тарыхы бар Кыргыз күрөшүнүн дүйнөлүк спорт аренасына чыгып, даңазаланып жатканын белгиледи. Ал ошондой эле ар бир кыргызстандык мекенчил атуул үчүн бул иш-чара абдан маанилүү экенин, себеби аталардын мурасын келечек муунга татыктуу өткөрүп берүү, улуттун күчтүү жана улуу болушуна өбөлгө түзөрүн айтты.
Улугбек Ормонов улуттук баалуулуктарды, үрп-адаттарды, кыргыздын каада-салтын жана улуттук спорт оюндарынын өнүгүшүн колдоп келерин айтып, 20 жылдан бери жылына бир жолу жаштарды таза жана сергек жашоого үндөп, турнирлерди өткөрүп келерин белгиледи. Ал ошондой эле, Америкада жашаган кыргыз мекендештерин колдоо үчүн ардактуу коногу катары чакырылганына ыраазычылык билдирип, бул эл өкүлү үчүн чоң сыймык экенин кошумчалады.
Ачылыш аземинин алкагында Улугбек Ормонов Жогорку Кеңештин төрагасынын атынан Эл аралык Кыргыз күрөш федерациясынын Америкадагы Кыргыз күрөш федерациясынын координатору Мелис Жакиповго Кыргызстанда жана чет өлкөлөрдө Кыргыз күрөшүн өнүктүрүү максатында жазылып жаткан мыйзамдарга кошкон салымы үчүн Жогорку Кеңештин медалын тапшырды. Ошондой эле, Аарон Скотт Венделди Кыргыз күрөш федерациясынын Америкадагы президентин Жогорку Кеңештин ыраазычылык каты менен сыйлады.
