4-февралда 2010-жылы туулган Аннас Айтбаев Бишкектеги №72 мектепте сабалып, кийин ооруканада каза тапкан. SEREPTV телеканалына маркум окуучунун ата-энеси маек беришти.
Анда маркум Аннас Айтбаевдин апасы Нуризакан Эрмекбаева окуя болгон 21-январь күнү саат 11лер чамасында Бишкектеги №3 балдар ооруканасына келгенде хирургдар текшерип көрүп «Баланы сабап коюшкан эмеспи» деп сурашкан. Аннас «жок» деп жооп бергенине карабай ооруканада жатып, дарыланууну айтышкан. Асма укол берип жатканда баласы тескерисинче кыйналганын айтат эне.
«Балам калп айтчу эмес. Ага асма укол салганда куса баштады. «Мама, башым ооруп кетти, кулагым укпай баратат» деп жатты. Дарыгерлер эртең МРТга түшөсүңөр деп жатышты. Ошентип, саат 19-20лар чамасы болду. Балам чыдабай калганда рентгенге жиберишти. Анан невропатологго бардык. Алар дары жазышты. Баламдын дене табы 34,5ке түштү. Мен корко баштадым. «Эмнеге себебин билбей жатасыңар, балам кыйналып жатат» дедим. Бир учурда хирург келип, «боор тарабы ылдыйлап турат» деди. Ошентип 23:30-24:00төр болуп калды. Мен баламды ЮРФАга алып барам дедим, анткени алар УЗИни эртең кылалы деп жатышкан. Аңгыча хирург келип жандандыруу бөлүмүнө деп алып кетишти. Ал жакта эки сааттай күттүк», — дейт Нуризакан Эрмекбаева.
Эненин айтымында, эки сааттан кийин дарыгерлер чыгып, баланын жүрөгү чоңоюп кетиптир, азыр кардиолог келет дешкен. Эртеси, саат 9дарда Нуризакан Эрмекбаева эжесине кабарлап, ал Улуттук кардиология институтуна байланышып, дарыгерлер 3-балдар ооруканасына барышкан.
«Баланы жылдырбаш керек деп жеке клиниканадан ЭХО чакырганбыз, алар келип жүрөгүн тартышты. Анан Улуттук кардиология институтуна жеке тез жардам унаасын чакырып, алып бардык. Ал жерге келгенде лифттен чыгып, жандандыруу бөлүмүнө кирип баратканда эле балам жаман абалда болчу. Дарыгерлер ары-бери чуркап калышты. Саат 12-13төрдө врач чалып, «балаңыздын жүрөгү ритмге түштү, бирок баланын абалы оор» дешти», — дейт Аннастын апасы.
Эненин айтымында, ал ортодо класс жетечиси менен улам байланышып, Аннастын классташтарынан кантип, кайсы жерден кулаганын тактоону суранган. 24-январда мектептин директору менен класс жетекчиси Аннастын ата-энесине жолугуу үчүн ооруканага барышкан. Аннастын атасы да Орусиядан келип калгандыктан, мектеп директорунан «Камераңар барбы, барып көрөйүн» деп сураган. Мектеп жамааты камералар иштебей турганын айтышкан. Мугалимдер баланын абалын сураганда апасы дарыгерлердин айтканын бөлүшкөн.
«Мен дарыгерлерден уккан сөздөрдү айттым. «Баланын жүрөгү чоңоюп кеткен, баланын абалы оор» деп. «Жүрөгү чоңоюп кетиптир» деген сөздү мугалимдер «Баланын жүрөгү ооручу экен, кичинесинен жүрөк кемтиги бар экен, операция боло турган бала экен» деп маалымат таратып коюшкан. Көрсө, ага чейин эле мугалимдер баламды 9-класстын окуучулары урганын билишкен экен. Урган баланын ата-энеси, бала менен сүйлөшүшүптүр. Аларды баламдын классташтары көрүптүр», — дейт Нуризакан Эрмекбаева.
Баласы 4-февралда каза болуп, ата-эне Аннастын сөөгүн айылга алып кетишкен. Аннастын классташтары аны менен коштошууга үйүнө келип, Нуризакан Эрмекбаеванын инисинин уулуна кезигишкен. Классташтары Аннасты 9-класстын балдары сабаганын айтышкан. Баланын сабалганын эртерээк билгенде дарыгерлер башкача аракет кылмак деген эне буларды айтты: «Эгер мугалимдер эртерээк бала жыгылбаптыр, сабалыптыр дегенде, дарыгерлер да башкача кадам кылышмак. Өтү жарылган же көк боорго тепкен деп да айтып жатышат».
Аннастын апасынын айтымында, сабаган балдар бешөө болгон. Балдар тизилип турганда, Аннас биринчи тургандыктан алгач аны сабап, ал эсин жоготкондо башка балдарды да сабаган.
«Кайрылып келип кайра тургузгула деп, дагы сабайын десе, баламдын өңү кубарып жаман болуп тургандыктан Аннастын классташтарын бирден чыгарып жиберишкен. Анан сабаган балдардын экөө баламды медпунктка алып келишкен», — дейт апасы.
