Бишкекте курулуп бүткөн таштандыларды кайра иштетүүчү завод таштандыларды өрттөп жок кылуу аркылуу электр энергиясын өндүрөт. Учурда процесс башталып, өндүрүлгөн электр энергиясы электр тармактарына кошулду. Азырынча жаңы кошулуп 3,5 МВт берип жатат, бүгүн кечке чейин 18 МВт кубаттуулукка жетери күтүлүүдө. Бул тууралуу президенттин маалымат кызматынын жетекчиси Дайырбек Орунбеков жазды.
“Толук кандуу ишке киргенден кийин 30 МВт кубаттуулукта электр энергиясын берип, электр тармактары аркылуу элге кызмат кылат. Мына ошентип, 50 жылдан ашык түтөп жаткан таштанды полигонунан кутулдук деп айтсак болот. Эми таштандыларды заводдо өрттөп, андан электр энергиясын өндүрүп, калдыктарынан курулуш материалын чыгарабыз. Завод түтөбөйт, бир аз гана буу чыгат ал дагы жок болуп кетет. Экологияга зыяны жок, эн акыркы заманбап ыкмалар колдонулуп курулган”, — деген Орунбеков.
Анын айтымында Бишкекте 1 суткада 1000 тоннага жакын мусор чогулса, бул завод суткасына 1200 тонна мусорду жок кылуу кубаттуулукка ээ.
