Бүгүн, 8-майда Жогорку Кеңештин депутаты Замирбек Мамасадыков Жалал-Абад облусуна жасаган иш сапарынын алкагында Таш-Көмүр шаарында бокс залынын курулушун баштоо иш-чарасына катышты. Саамалыкка шаар мэри Келсинбек Бектемиров баштаган жергиликтүү бийлик өкүлдөрү жана шаар тургундары күбө болушту.
Депутат шаарда болгон мурдагы иш сапарында залдын кейиштүү абалын көрүп, ушул демилгени көтөргөнүн белгиледи.
«Кичинекей кыздардын шарты жок имаратта машыгып жатканы мени аябай таасирленткен болчу. Ошол учурда тилек-максат кылып, минтип жаңы имараттын курулушун баштап жатабыз. Келечекте бул залдан өлкөнүн желегин дүйнөгө тааныткан спорт чеберлери чыгарына үмүттөнөм», — деди Замирбек Мамасадыков.
Спорттук залдын имараты 35 миллион сомдон ашык суммага республикалык бюджеттен салынып жатат. Мында кыз-келиндер үчүн күрөш залы да уюштурулат.
Ошондой эле, депутат шаардагы №12 А.С.Пушкин атындагы мектебинде спорт залдын курулушун баштоо салтанатына катышты. 800дөн ашык бала окуган мектепте спорт залдын жоктугу көйгөй жаратып келген. 29 миллион сомдук долбоор быйыл жыл соңуна чейин бүтөт деп пладалууда. Муну менен катар Замирбек Мамасадыков 120 орундуу балдар бакчасынын долбоору менен таанышып, имарат курулуучу жерди көрдү. Шаар бийлиги кезекте турган наристелердин көптүгүн эске алуу менен жаңы имарат куруу муктаждыгын белгилешти.
Иш сапардын жүрүшүндө эл өкүлү Таш-Көмүр шаарында курулушу башталган мечитке да барып, көмөк көрсөттү. 6-майда башталган депутаттын аймактардагы жолугушуулары Шамалдуу-Сай шаарында уланат.
