2025-жылдын жыйынтыгы боюнча фотокапкандарды жана фототехниканы колдонуу менен жүргүзүлгөн мониторингдин негизинде «Хан-Теңири» мамлекеттик жаратылыш паркынын аймагында жапайы жаныбарлардын, анын ичинде сейрек жана коргоого алынган түрлөрдүн саны туруктуу өсүп жаткандыгы аныкталды.
Айрыкча Кыргыз Республикасынын Кызыл китебине киргизилген күрөң аюунун популяциясынын көбөйүшү өзгөчө көңүл бурууда. Бул аймакта жашаган күрөң аюу тянь-шань ак тырмактуу аюу деп да аталат, бул анын өзгөчөлүгүн жана жогорку табиятты коргоо маанисин далилдейт. Табигый комплекстерди жана биологиялык ар түрдүүлүктү сактоо максатында «Хан-Теңири» мамлекеттик жаратылыш паркы функционалдык зоналарга бөлүнгөн. Аларга корук зонасы, экологиялык туруктуулук зонасы, туристтик-рекреациялык зона жана чектелген чарбалык ишмердүүлүк зонасы кирет.
Жаратылыш паркы «Адыр-Төр», «Сары-Жаз», «Эңилчек» жана «Кайыңды» сыяктуу бир нече участоктордон турат. Ар бир участокто айлана-чөйрөнүн абалын туруктуу көзөмөлдөө жана коргоо режиминин сакталышын камсыз кылуу үчүн айланып текшерүү иштери уюштурулган.
Жаратылыш ресурстары, экология жана техникалык көзөмөл министрлиги жапайы жаныбарлардын санынын оң динамикасы өзгөчө корголуучу жаратылыш аймактарын коргоо боюнча жүргүзүлүп жаткан пландуу иштердин, табиятты коргоо чараларынын күчөтүлүшүнүн жана мониторингдин заманбап ыкмаларын колдонуунун натыйжасы экенин белгилейт.
