«Спутник» басылмасы 33 жаштагы Мээрим Кайрат кызы кантип уурдалып, кайдан табылганын ишенимдүү маалымат булактарына таянып жазды.

Маалыматка караганда, алгач милицияга аялдын таанышы кайрылып, Мээримди күйөөсү жумуштан белгисиз тарапка алып кеткенин айткан. Жолдошу келинчегин ушул кишиден (милицияга кайрылган) кызганып жүргөн.

«Милиция изделип жаткан аял менен күйөөсүн Бишкектен ижарага алынган батирден табышкан. Видеодо аялдын чачы кыркылып, бети кескиленгенин көрүүгө болот. Шектүү күнөөнү моюндабай, келин өзүн-өзү кескилегенин айткан. Мээрим ооруканага жеткирилип, амбулатордук жардам алган»,- деп айтылат маалыматта.

Кечээ, 13-майда Ленин РИИБдин кызматкерлери тарабынан адам уурдоого шектелген жаран кармалган.

12-май күнү саат 23:30 чамасында «102» кызматына ошол эле күнү болжол менен саат 15:40 чамасында аялды жумуш ордунан күйөөсү кызганычтан улам күч менен алып кеткендиги жана жабырлануучунун кайда экени белгисиз экендиги тууралуу билдирүү түшкөн.
Бул факты боюнча Ленин РИИБдин Тергөө кызматы тарабынан Кылмыш-жаза кодексинин 165-беренеси (Адам уурдоо) боюнча кылмыш иши козголгон. Жүргүзүлгөн ыкчам-иликтөө иштеринин натыйжасында, Ленин РИИБдин кызматкерлери 1984-жылы туулган шектүүнү кармаган.