УКМК өлкөдөгү эң ири интернет провайдерлеринин бири болгон «ЭлКат» ЖЧКсындагы мамлекеттин үлүшүн жеке менчикке мыйзамсыз өткөрүп берүү фактысы боюнча Башкы прокуратура тарабынан козголгон кылмыш ишин иликтөөдө.
Маалыматка ылайык, «ЭлКат» ЖЧКсы 1994-жылы 51 пайыз Президентинин Аппаратына тиешелүү болуп түптөлгөн. Калган 49 пайызы «Компьютердик технологиялар борбору» ЖЧКсы тийиштүү болуп, мамлекеттик-жеке ишканасы түзүлгөн.
«1998-жылы «ЭлКат» ЖЧКсынын уюштуруучуларынын курамы өзгөртүлүп, «Компьютердик технологиялар борбору» ЖЧКсынын ордуна «Айкөл-5» ЖЧКсы кошулган. Президентин Иш башкармалыгынын айрым кызмат адамдары «АЙКӨЛ-5» ЖЧКсынын уюштуруучулары болуу менен бирге «ЭлКат»ЖЧКсынын 100% үлүшүн мыйзамсыз ээлеп алуу максатында ушул компаниянын башка уюштуруучулары менен кылмыштуу сүйлөшүүлөргө барышкан», — деп жазылат маалыматта.
Андан кийин 2006-жылдан 2007-жылга чейинки мезгилде аталган адамдар өздөрүнүн кызматтык ыйгарым укуктарын жана бийлик түзүмдөрүндөгү коррупциялык байланыштарды пайдалануу менен эч кандай компенсация төлөбөстөн, Президентинин Иш башкармасын «ЭлКат» ЖЧКсынын катышуучуларынын курамынан чыгарган мыйзамсыз сот чечимдерин чыгарышкан. Ошентип, мамлекетке өзгөчө ири өлчөмдө зыян келтирилген.
Учурда бул иш боюнча мамлекеттин кызыкчылыгына келтирилген зыяндын жана алынбай калган кирешенин так суммасын аныктоого багытталган тергөө иштери жүргүзүлүүдө.
Кылмыш ишинин алкагында Президентин Иш башкармасынын мурдагы кызматкерлерине жана «Айкөл-5» ЖЧКсынын уюштуруучуларына К.З.М. жана Ш.С.И. жана башка адамдарга коррупция боюнча тиешелүү айып тагылып, шектүүлөр соттун чечими менен камакка алынган.
