«Кабар» агенттиги мамлекет башчысы менен болгон кезектеги маегинде журналист Лейла Саралаеванын Курманбек Бакиев тууралуу жарыялаган видеосуна токтолуп, кыска жооп алган.
«Мен ал журналистти тааныбайт экем. Ушунча жыл саясатта жүрүп, көңүл деле бурбаптырмын. Маек деле берген эмес экем. Бирок ошентсе да, сурооңузга жооп берип коёюн. Мени 2005-жылы Бакиевдин штабында иштеген дегени карандай калп. Мен Куловдун штабында иштегем. Ушуну так билбегенден кийин сиздин бул журналист кесиптешиңиз «самопал» же бир жолу колдонулуп ыргытылган кол жоолук сыяктуу журналист экен.
Куловдун штабында иштегенимди Атамбаев жакшы билет. Себеби Атамбаев Куловдун штаб башчысы болгон. Кулов менен Бакиев тил табышып, тандем болгондон кийин штаб жабылып, баарыбыз тарап кеткенбиз», — деген өлкө башчысы.
Жергиликтүү ЖМКлардын бирине экс-премьер Феликс Кулов бул маалымат боюнча комментарий берди. «Мен Саралаеванын сөздөрүн уккан жокмун, бирок Садыр Жапаров тууралуу сурашты. Мындай маалымат мени таң калтырды. Мен мындай факты бар экенин тастыктадым, бирок ал көпкө иштеген эмес», — деди ал.
Ал 2005-жылдын 24-мартында абактан чыккандан көп өтпөй президенттик шайлоону мөөнөтүнөн мурда өткөрүү маселеси көтөрүлгөнүн эске салды. Алгач Алмазбек Атамбаев Куловго кайрылган, андан кийин Садыр Жапаров менен Чолпон Баекова кошулган.
«Алар мени президенттикке ат салышууну сунушташты. Мен беш жыл абакта отургандан кийин ден соолугумду калыбына келтирип, саясий кырдаалды түшүнүшүм керек эле. Бирок алардын өжөрлүгү жана башка тарапташтардын колдоосу менен акыры мени ынандырышты. Садыр Жапаров да менин командама кошулду — анын аброю бар, жакшы уюштуруучу жана керектүү байланыштары бар болчу. Ал чындап эле жардам берген», — деген ал.
Кийин талапкерлигин жарыялаганда Азимбек Бекназаров ага жеке жолугушуу өтүнүчү менен кайрылган. «Ал “Аскар Акаев 14 жыл президент болду, эми кезек түштүктүн өкүлүнө келди” деди. Мен аймактык бөлүнүүнү, трайбализмди колдобойм деп жооп бердим. Буга ал «Силер бул беш жылда көп нерсени жоготтуңар, эл экиге бөлүндү, бул факторду эске алуу керек» деди», — деген Кулов.
Феликс Кулов Курманбек Бакиев менен тандем түзүүнү сунуштаган Бекназаров экенин кошумчалаган.
«Мен өзүмдүн командамды чогултуп, көп талкуудан кийин өлкөнү бөлүп-жаруудан сактоо үчүн келишим түздүк. Натыйжада, ар кандай саясий күчтөрдүн башын бириктирген Элдик конгрессти Бакиев уюштурду. Мен өлкөдөгү стабилдүүлүк үчүн премьер-министрликке макул болдум. Менин командам бул чечимди колдоп, штабдын кереги жок болуп калды. Биз акча чогулткан жокпуз, бирок эл өзү колдоп келди», — деди ал.
«Төрт жылдан кийин мурдагы коргоо министри Исмаил Исаков командадан чыгып кеткен. Ал жыйындардын биринде Бакиевдин «Бир жылдан кийин мен Куловду кетирем» деп айтканын айтты, бирок, убакыт көрсөткөндөй, анын айтканы туура болуп чыкты, натыйжада Бакиев бийликтен ажырап калды, мен аны менен көпкө иштешпей калганыма ыраазымын», — деген Кулов.
