«Мен бул постту досум, кесиптешим жана санаалашым Жаныбек Болотбековичке арнагым келет. Болгон окуя боюнча аны актабайм, бирок жигиттин апасы жана жакындарынын алдында, бардык кыргыз элинин алдында кечирим сурайм. Кечиримдүү бололу». Мындай постту депутат Фархад Алимжанов жазды.
«Биз жаш жана келечектүү саясатчынын бир катасынан улам сынып калышына жол бербешибиз керек. Абировдун жетишкендиктери көп жана биз аны билебиз», — деп жазылат анын билдирүүсүндө.
Депутат Жаныбек Абиров өзү жогорудагы окуя боюнча үн ката элек.
- Бишкектин ресторандарынын биринде мушташ тартылган видео соцтармактарга тараган. Мушташка катышкандардын бирин депутат Жаныбек Абиров деп таанышып, айрым маалыматтар боюнча, ал мекеменин күзөт кызматы менен чырдаша кеткени айтылууда.
- Милицияга Д.А. аттуу жаран арыз менен кайрылып, 12-мартта түнкү саат 3:30 чамасында ага белгисиз адам кол салып, сабап салганын айткан. Жабырлануучу Улуттук госпиталга медициналык жардам сурап кайрылып, ага «баш сөөктүн жабык травмасы» деген диагноз коюлган. Факты каттоого алынып, тергөөгө чейинки текшерүү башталып, соттук-медициналык экспертиза дайындалган. Милициядан мушташтын бардык катышуучулары аныкталганын жана тергөө иштери улантылып жатканын билдиришти.
- 13-мартта Бишкектеги мушташка шектүү эки жаран (1988-жылы туулган П.Э. жана 1987-жылы туулган А.Д.) кармалды.
- Президент Садыр Жапаровго мушташуу жана Жогорку Кеңештин депутаты Жаныбек Абиров тарабынан жарандын сабалуу фактысы тууралуу маалымат берилип, ал Ички иштер министрлигине болгон окуяны ар тараптуу иликтөөнү тапшырганы маалымдалган.
