Президентти тандаганга барбаган эл Конституцияны окумак беле? Мындай пикирин сатирик, коомдун активдүү жараны Рахман Разыков СЕРЕП МЕДИА маалымат агенттигине берген маегинде билдирди.
“Конституция — бул бийлик менен элдин ортосундагы келишим. Жөнөкөй жарандар эмне кылса болот, эмне кылса болбойт, бийлик эмне кылса болот, эмне кылса болбойт деген келишим. Учурда мына ушул жөнүндө талкуу кылып жатабыз. Бул мыйзам долбоору эл арасында талкууланды, эл дагы үн кошту дегенге мен кошулбайм. Себеби, мамлекеттин президентин тандап жатканда 2 миллиондон ашык шайлоочу барган жок. Мына дал ушул өлкө башчыбызды шайлап жатканда бюллетенден ушул президент болсун деп тандап койгонго барбаган эл коомдук талкууга коюлган мыйзам долбоорун окуп чыкмак беле? Муну окуш керек”, — деди Разыков.
