Кечээ, 24-августта Кыйноолорду алдын алуу боюнча улуттук борборго Чүй облусунун Сокулук районунун милиция кызматкерлери тарабынан кыйноо фактылары боюнча 3 адамдан арыз түшкөнү маалым болгон. Анда 3 жаран тең милиция кызматкерлери башына уксус куюлган баштык кийгизишкенин, кыйноо 5 саатка уланганын билдиришкен. Окуя боюнча Чүй ОИИБ маалымат таратып, маалымат чындыкка дал келбей турганын билдирди.
«Сокулук райондук ички иштер бөлүмүндө милиция кызматкерлери тарабынан кармалгандарга карата физикалык кысымдар көрсөтүлүп, ур-токмокко алынган деген билдирүү чындыкка дал келбейт.
Кеп 1990-жылы туулган К.Ж. аттуу жарандын Сокулук районунун Чат-Көл айылында мыкаачылык менен өлтүрүлгөн окуясына шектелип жаткан 1988-жылы туулган Р.Ю., 1993-жылы туулган Р.Д. жана 1965-жылы туулган Д.А. аттуу жарандар жөнүндө болуп жатат. Бул жарандардын жогорудагы оор кылмышка катышы бар экендиги тергөө жүрүшүндө алынган буюм далилде, жана башка иш материалдары менен тастыкталган. Ошол себептен айыпталуучулардын милиция кызматкерлери тарабынан физикалык же моралдык кысым көрсөтүү жолу менен күнөөнү моюнга алдырды деген билдирүүлөрү — бул коомчулукту адаштырууга жана алардын жасаган кылмыштын жоопкерчилигинен качуу аракети болуп эсептелет», — дешти.
Кармалган жарандар Чүйдө адам өлтүрүүгө шектелип жатат. СЕРЕП МЕДИА маалымат агенттигине 25-июлда Чүйдө жарандын жансыз денеси табылганы маалым болгон. Маалыматты редакцияга Чүй ОИИБден тастыкташкан. «Сокулук РИИБде киши өлтүрүү боюнча кылмыш иши козголуп, шектүү катары 3 адам кармалды», — дешкен милициядан.
26-июлда Чүй ОИИБ маалымат таратып, 22-июль күнү Сокулук РИИБге жаран арыз менен кайрылып, жолдошу 1990-жылы туулган жаран ошол күнү саат 09:00 чамасында үйүнөн унаасы менен чыгып, кайтып келбегенин билдирген. Ага таандык унаа айылдын четинен табылып, шек жараткан. Тергөөнүн жүрүшүндө жаран жоголгон күнү андан карызга акча алып, кайтарбай жүргөн таанышына кеткендиги аныкталган. Кылмыш ишине шектүү катары Сокулук районунун 1988, 1993 жана 1965-жылы туулган тургундары аныкталып, алардын оор кылмышка катыштыгы бар экендигине далилдер табылган.
Тергөө амалдарын жүргүзүү учурунда шектүүлөр дайынсыз жоголгон жаранды өлтүрүп, сөөгүн айыл четине катып коюшкан. Учурда «адам уурдоо» беренеси менен козголгон кылмыш иши «адам өлтүрүү» беренесине өзгөртүлүп, тергөө тарабынан жасалган оор кылмыштын бардык жагдайлары такталып жатат.
