Айыл чарба министрлигине караштуу Өсүмдүктөрдү химиялаштыруу, коргоо жана карантин департаментинин Чүй-Бишкек өсүмдүктөрдү химиялаштыруу, коргоо жана карантин башкармалыгынын кызмат адамдарынын мыйзамсыз иштерине бөгөт коюлду. Бул тууралуу УКМКдан маалымдашты.
Жогорудагы аты аталган башкармалыктын айрым кызматкерлеринин коррупциялык иштери боюнча маалыматтар УКМКга келип түшкөн. Козголгон кылмыш ишинин алкагында департаменттин Чүй башкармасынын кызмат адамдарына (1000 сомдон 3000 сомго чейин) белгилүү акчалай сыйлык үчүн, «Фитосанитардык жана карантиндик сертификаттарды реэкспорттоо, фитосанитардык жана карантиндик сертификаттарды берүүнүн тартиби жөнүндө» жобонун талаптарын аткарбастан, карантинге алынган продукцияны экспорттоо үчүн шайкештиктин фитосанитардык сертификаттарын берүүнү жүзөгө ашырышкан. Ошону менен бирге жогорку кызмат адамдары купуялуулукту сактоо максатында кызмат адамы менен жүктүн ээси ортосунда ортомчу болгон айрым жеке фирмалар менен сүйлөшүүгө барышкан. Козголгон кылмыш ишинин алкагында жүргүзүлгөн ыкчам-иликтөө иш-чараларынын натыйжасында, Департаментинин Чүй башкармалыгынын жооптуу кызматкерлери, тактап айтканда Аламүдүн жана Москва райондорунун кызматкерлери тарабынан системалуу негизде акча каражаттарын алуу фактылары катталган.
Топтолгон далилдердин негизинде аталган башкармалыктын Чүй-Бишкек башкармалыгынын кызматкерлери К.Т.А., К.С.К., К.Б.Э. кармалып, УКМК тергөө камак жайынын убактылуу кармоочу жайына киргизилди. Учурда аталган адамдардын кылмыштуу аракеттеринин натыйжасында мамлекетке келтирилген зыянды аныктоо ошондой эле бул коррупциялык ишке катышкан башка адамдардын бетин ачуу жана жоопко тартуу иштери жүрүп жатат.
