Курулуш, архитектура жана турак жай-коммуналдык чарба министри Нурдан Орунтаев өлкө аймагында бир нече жылдардан бери көйгөй болуп келген көп кабаттуу үйлөрдүн маселелери чечилбей келе жатканын билдирди.
Тактап айтканда, курулуш компаниялар тарабынан үйлөр курулуп, бүткөнү бүтүп, бирок документтери бүтпөй калган учурлар көп. Ал эми кээ бир үйлөр курулушу аягына чыкпай, батир алган кардарлар тарабынан өз күчү менен бүткөрүлүп жашап келишет, ал эми документтери такыр жок учурлар да көп.
«Ушундай үйлөрдүн саны өлкө аймагында жүздөн ашык жана алардын баардыгы жашоо-шарты коммерциялык түрдө болуп келүүдө. Тактап айтканда суу, свет, канализация, жылытууга болгон баасы коммерциялык багытта төлөнүүдө, анысы аз келгенсип, маңдай тери менен сатып алган үйлөрүнө техникалык паспорт алыша албайт, каттоого тура албайт, мектеп, бала бакчага балдарын кезекке тургуза алышпайт жана шайлоого катыша алышпай келишүүдө.
Мындай жагдайды курулуш компаниялардын ээлери тарабынан убагында шалаакы мамиле жасап, жашоочуларды талаага таштап кеткендиги. Алардын ичинде аттуу-баштуу, ырдаса оозунан бал чыккан инсандарыбыз да бар. Болоор иш болду, бирок көйгөй чечилбей, бул маселе биринчи муундан экинчи муунга өтүп келе жатат жана бул маселени аягына чыгарыш керек.
Бүгүнкү күндө Курулуш министрлиги тарабынан аталган көп кабаттуу үйлөр боюнча массалык түрдө документтерин аягына чыгаруу боюнча иш башталды жана жакынкы арада биринчи документтерди бере баштайбыз. Ал эми ушундай документтери аягына чыкпай калган көп кабаттуу үйлөрдүн жашоочуларын Курулуш министрлигине чакырабыз. Аталган иш-чаралар биздин жарандарга тийиштүү жашоо-шартын жакшыртуу жана алар жашап жаткан үйлөрдү документтештирүү», — деп жазды ал.
