Бишкекте жеке клиникада сакал эктирүү үчүн операция жасатып жаткан маалда 30 жаштагы хирург, флеболог Элдос Турсунбеков күтүүсүз каза болгон. Бул тууралуу СЕРЕПТВ каналына анын жакындары билдиришти.
Маалыматка караганда, окуя 8-майда болгон. Атасы Болотбек Мамбеталиевдин айтымында, Элдос Турсунбеков уулдарынын эң кичүүсү болчу.
«Уулум үйдөгү балдардын эң кичүүсү. Ошол күнү кечирээк турду. Сакалын өстүрмөк. «Балам, сага эмне кереги бар?» дедим. «30га чыктым, буга чейин өспөгөн сакал, качан өсмөк эле?» деп койду. Мен аны жеңил эле деп ойлодум. Саат эртең менен 11лерде жумушка кетип жатып, жасатарын айтып, кеч келе турганын эскертти. Кечинде кеч келгенине көнүп калып, келет деп отурганбыз. Түнкү 12лерде ортончу уулумдун досумун деп чалып калды. 9-майга шишкебек кылып отуралы дегенбиз. Эт берип жиберген го дедик. Сыртка чыксак эле туугандар чогулуп келип калыптыр. Угузушту. Аларга досу чалыптыр. Досунун карындашы ооруканада иштечү экен. Ошол кыз угуп калып, байкесине чалыптыр.
3 эркек 1 кызым бар. Эркектердин эң кичүүсү болчу. Медициналык академияны бүтүп, ординатураны Орусиядан бүткөн. Ошол жакта 2 жыл иштеп, келген. Ооруканада хирург болуп иштеп жүрдү. Жеке клиникага кирип, мамлекеттик ооруканага түндө нөөмөткө барчу. Ден соолугу чың болчу. Спорт менен машыкчу»,— деди атасы.
Окуя боюнча Биринчи Май РИИБден маалымат беришип, 1995-жылы туулган жаран 8-майда Бишкектеги Горький көчөсүндө жайгашкан жеке клиникалардын биринде каза болгонун билдирди. «Аталган факты каттоого алынып, териштирүү иштери башталган. Бардык керектүү экспертизалар дайындалып, анын жыйынтыгы менен болгон окуяга учурдагы мыйзамдарга ылайык юридикалык баа берилет»,- деп айтылат маалыматта.
Саламатсыздарбы?
Негизи тыкыр көзөмөлгө алынганбы?
Балким, көрө албастар жасап коюштубу, ким билет?
Кайрадан текшерүү керек!
Врачтар өлкөбүздө ансыз да аз.