Уюшкан кылмыштуу топту каржылаган жана опузалап акча талап кылган кылмыштуу топтун мүчөлөрү кармалды. Бул тууралуу УКМКдан билдиришти.
УКМК тарабынан жүргүзүлүп жаткан тергөө-ыкчам иш-чараларынын алкагында сотко чейинки өндүрүштүн материалдарынын негизинде «Братский круг» эл аралык кылмыштуу тобунун курамына кирген, «Мыйзамдагы ууру» Камчы Асанбектин уюшкан кылмыштуу тобунун ишмердүүлүгүн каржылоо фактысына төмөнкү Кыргыз жарандарынын катыштыгы бар экендиги аныкталган:
— Б.Т.К. — Буга чейин ИИМ системасында жетекчилик кызматтарды аркалаган, кылмыш чөйрөсүндө уюшкан кылмыштуу топтун лидери Чыңгыз Жумагуловдун «Дөө Чынгыздын» «өкүл атасы» катары белгилүү болгон.
— Т.Ч. — Чыңгыз Жумагулов менен жана «мыйзамдагы ууру» аталган «Сакал» менен тыгыз байланышы бар.
Т.А.Т. — Камчы Асанбекке жакын, жаш спортчуларды кылмыштуу чөйрөгө тартуу менен алектенген, Асанбектен спорт боюнча «куратор » болгон, олимпиадалык резервдеги балдар-өспүрүмдөр спорт мектебинин биринин директору кызматын ээлеген.
Маалыматка ылайык, уюшкан кылмыштуу топтордун лидерлери Асанбек, Анапияев жана Жумагулов Б.Т.К. менен сүйлөшүп, ок атуучу куралды АКСУнун автоматын жана психологиялык басым менен күч колдонуу жолу аркылуу Кыргыз жаранынан Чүй облусунун Аламүдүн районунун Кара-Жыгач айылында жайгашкан 2 миллион долларга бааланган 2 га жер тилкесин тартып алышкан. Белгилүү бир убакыттан кийин Б.Т.К.нын жакын туугандарына кайрадан каттоодон өткөн.
Мындан тышкары, кылмыштуу топтун мүчөлөрү Б.Т.К., Т.А.Т. жана Т.Ч. опузалап акча талап кылуу жана физикалык жактан жок кылам деп коркутуу аркылуу жарандан 300 миң АКШ долларын алгандыгы аныкталган, ал кийин «Мыйзамдагы ууру» Камчы Асанбекке өткөрүлүп берилген, көрсөтүлгөн факты боюнча УКМК дарегине ишкердик субъекттеринин өкүлдөрүнүн бири кайрылган.
Топтолгон материалдардын негизинде 16-майда аталган адамдар кармалып, Бишкек шаарынын Октябрь райондук сотунун чечиминин негизинде №21 мекемеге 16-майга чейин камакка алынган.
