3-июнда Бишкектин Биринчи Май райондук соту тарабынан Кой-Таш окуясына карата, айрыкча мурдагы президент Алмазбек Атамбаевге чыгарылган сот өкүмү коомчулукта түрдүү пикирлерди жаратты. Айрымдар чечимди колдосо, башкалар жаза оор болду деп эсептешүүдө. Президент Садыр Жапаров бул иш боюнча «Кабар» агенттигине пикирин билдирип, соттун чечимине кийлигишпөө керектигин белгиледи.
— Мурдагы президент Алмазбек Атамбаевге карата соттун өкүмү чыкты. Ага ылайык, айрым мүлктөрү конфискация болуп, өзү 11 жылга эркиндигинен ажыратылды. Бул чечимге коомчулуктун реакциясы бир беткей эмес. Колдогондор да бар, “аз болду, көп болду” дегендер да бар…
— Кандай чечим болсо да, соттун чечимдерине баш ийгенди үйрөнүшүбүз керек. Мен дайыма “соттордун ишине кийлигишпегиле” деп айтып келем. “Чыгарган чечими мыйзамдуу эмес десеңер, жогорку инстанцияларга кайрылгыла, акыркы чекитти Жогорку Сот койсун” деп келем. Акыркы убакта баарыңар эле күбө болуп келе жатпайсыңарбы, актап жатышат, мисалы, кемпир-абадчылар үй камагына чыгарылып, пробация берип коюп жатышат. Демек, сот процессинде баары аныкталып, анан соттор ошондой чечим чыгарганга туура келип жатса керек деп, соттордун чечимдерине кийлигишкен жокпуз жана мындан ары да кийлигишпейбиз.
