УКМК тарабынан ири сүткор жана күрөөкана тармагынын ээси С.М.А.нын мыйзамсыз иштерине бөгөт коюлду. Аталган жаран каржылык кыйынчылыкка туш болгон жарандарга жогорку пайыздык чен менен акча берген.
Мындан тышкары ал өз убагында төлөй албай калган кардарлардын турак жайларын, жер тилкелерин жана коммерциялык мүлктөрүн мыйзамсыз тартып алуу боюнча аракеттерди уюштуруп, өзүнө тиешелүү нотариустарды жана башка жакын адамдарын тартуу менен жалган же ойдон чыгарылган жасалма жарандык-укуктук бүтүмдөрдү түзүү аркылуу менчик укугун өткөрүп берүүнү тариздөө иштерин жүргүзгөн.
Ошондой эле жабырлануучуларга кысым көрсөтүү, коркутуу жана психологиялык басым көрсөтүү элементтери менен коштолгон мыйзамсыз иш-аракеттердин уюшкандык мүнөзүн көрсөткөн далилдер алынды. Өзүнүн мыйзамсыз иш-аракеттерин жаап-жашыруу үчүн С.М.А. укук коргоо жана башка мамлекеттик органдардагы мүмкүн болгон байланыштарын колдонуу аркылуу, андан жапа чеккен жарандардын өз укуктарын жана мыйзамдуу кызыкчылыктарын коргоо үчүн органдарга кайрылууларына тоскоолдук жараткан.
-жылдын 14-январында Бишкек шаарынын Биринчи май райондук соту тарабынан ага карата УКМКнын тергөө абагына камакка алуу түрүндөгү бөгөт коюу чарасы тандалды. Учурда кылмыш иши боюнча тергөө иштери улантылып, ага тиешеси бар башка адамдар аныкталууда.
