Эки ай мурун ден соолугу жабыркап, бир бөйрөгүн алмаштырууга муктаж болгон актёр Нуржаасын Жумагуловго Түркиядан ийгиликтүү операция жасалган. Жакында гана мекенине кайтып келген актёрдун ал-абалын сурап, баарлаштык.
«Мага апам бөйрөгүмдү берем дегенде баш тарттым. Апа мен ала албайм, 9 ай көтөрсөңүз, баксаңыз, чоңойтсоңуз анан… Мен баш тарттым. Башка донор издедик. Көп чыкты. Сураштырып отуруп, эгер бөйрөк башка бирөөнүкү болсо, анда жашап кетүү мүмкүнчүлүгү 60 пайыз экен, эгер жакын адамдыкы болсо, 80-95 пайыз дешти. Апам келип, катуу урушуп, ыйлады. Ошондо айла жок болуп калды. Апам мени экинчи жолу төрөдү», — деди ал.
