АКШнын Флорида штатында “Аалам сулуусу” сынагы өтүп, анда Мексиканын 26 жаштагы сулуусу, модель Андреа Меза жеңүүчү аталды. Ал эми биринчи вице-мисс титулу Бразилия, ал эми экинчи вице-мисс Перунун сулуусуна буюрган. Сынакка жалпысынан 73 өлкөнүн сулуулары катышкан.
Меза Мексиканын атынан титулга ээ болгон үчүнчү катышуучу. Буга чейин 1991-жылы жана 2010-жылы мексикалык сулуулар “Аалам сулуусу” аталышкан.
Андреа Меза сынактын соңунда сөз сүйлөп, анда сулуулуктун стандарттарын өзгөртүүнү каалай турганын айткан.
“Коомубуз өнүккөнү менен, дале стереотиптер менен күрөшүп келебиз. Мен үчүн сулуулук – бул сырткы келбет эле эмес, биздин ички дүйнөбүз, жүрөгүбүз, жүрүм-турумубуз. Эч качан бирөөгө өзүңөрдү басынтууга жол бербегиле”, — деген ал.