Коомчулукта Ысык-Көл облусунда 17 жаштагы кызды зордуктап, өлтүрүүгө шектелип кармалган адамды кылмыш жоопкерчилигине тартуу маселеси кеңири талкууланып жаткандыгына байланыштуу Жогорку соттун басма сөз кызматы төмөнкүлөрдү билдирди. 2006-жылдын 8-ноябрындагы Бишкек шаарынын Октябрь райондук сотунун өкүмү менен шектүү Кылмыш-жаза кодексинин (1997-жылдын 1-октябрындагы редакциясы) 167-беренесинин 1-бөлүгүндө көрсөтүлгөн кылмышты жасаган деп табылып, мамлекет пайдасына 5 000 (беш миң) сом өлчөмүндө айып пул төлөө жаза чарасы дайындалган. 2016-жылдын 11-февралындагы ошол эле соттун өкүмү менен Кылмыш-жаза кодексинин (1997-жылдын 1-октябрындагы редакциясы) 28-97-беренесинин 2-бөлүгүнүн 8 жана 11-пункттарында көрсөтүлгөн кылмышты жасаган деп табылып, күчөтүлгөн тартиптеги абакта 12 жылга эркинен ажыратуу жазасы дайындалган. 2016-жылдын 12-майындагы Бишкек шаардык сотунун кылмыш иштери боюнча соттук коллегиясынын өкүмү менен Октябрь райондук сотунун 2016-жылдын 11-февралындагы өкүмү өзгөртүлгөн. Ал төмөнкү кылмыштарды жасаган деп табылган: * Кылмыш жаза кодексинин 168-беренесинин 3-бөлүгүнүн 2-пункту боюнча – мүлкүн конфискациялоо менен 6 (алты) жылга эркинен ажыратуу; *Жазык кодексинин 123-беренесинин 1-бөлүгү боюнча – 3 (үч) жылга эркинен ажыратуу. Жазык кодексинин 59-беренесине ылайык, кылмыштардын жыйындысы боюнча шектүүгө акыркы жаза катары мүлкүн конфискациялоо менен 7 жылга эркинен ажыратуу дайындалган. Калган бөлүгүндө өкүм өзгөртүүсүз калган. Ал сот тарабынан дайындалган жазасын өтөгөн.