Буга чейин УКМКнын төрагасы Камчыбек Ташиев небереси менен түшкөн жүрөк элжиреткен сүрөтүн жарыялап, «ата-энемдин үйүнө келдим, баары азыр башкача, мени Альмир неберем тосуп алды» деген жазуу калтырган. Көп өтпөй эле мурдагы президент Алмазбек Атамбаевдин уулу Сеид Атамбаев да уулдарынын сүрөтүн жүктөп, алардын чоң атасы жок өсүп жатканын жазды.
Кой-Таш окуясында каза болгон УКМКнын “Альфа” атайын бөлүгүнүн кызматкери Үсөнбек Ниязбековдун алты баласы да атасын сагынганын Министрлер кабинетинин төрагасынын орун басары Эдил Байсалов Twitter баракчасына жазды. Аткаминер спецназдын жоокери 2019-жылдын 7-августунда Алмазбек Атамбаевдин снайпердик мылтыгынан каза болгонун эске салды. «Урматтуу депутат Сеид Алмазбекович балдарына чоң атасы эмне үчүн абакта отурганын, офицерлерге ок атуу оор кылмыш экенин түшүндүрүшү керек», — деп жазган ал.
Алмазбек Атамбаевдин жактоочусу Замир Жоошев Байсаловдун жалган маалымат таратып жатканын билдирди. «Альфанын Кой-Таш окуясына түз тиешеси бар кызматкерлеринин көрсөтмөсүнө ылайык, Үсөнбек Ниязбековду жаш жигит Калашников автоматын колдонуп өлтүргөн. Мындай көрсөтмөлөр тергөөдө берилип, кылмыш ишинин материалдарында бар. Ошондой эле, УКМКнын мурдагы төрагасы Орозбек Опумбаев Кой-Таш окуясы боюнча комиссиянын жыйынында “Альфанын” командиринин орун басары АК-47 автоматы менен атылганын айтты», — деп жазган адвокат.