АКШнын Мамлекеттик департаменти Камчыбек Көлбаевдин камакка алынышына жана соттолушуна алып келген маалымат үчүн же Көлбаевдин кылмыштуу уюмунун каржылык схемаларын жок кылууга жардам бере турган маалымат үчүн сый акы 5 миллион долларга жогорулагандыгын жарыялады. Бул тууралуу Американын Кыргызстандагы элчилиги билдирди.
Билдирүүдө 2000-жылы Көлбаев мурдагы криминалдык кожоюнун өлтүрүүгө аракет кылуу жана дагы эки адамды өлтүрүү боюнча соттолгону көрсөтүлгөн. Ал ушул кылмыштары үчүн 25 жылга кесилген, бирок алты жыл абакта отургандан кийин качып кеткен. 2007-жылы АКШнын Мамлекеттик департаменти Көлбаевди өлкөдөгү «эң таасирдүү кылмыштуу топтун лидери» деп атаган, ал эми 2008-жылы 23-апрелде Москвада Көлбаевге Россиянын уюшкан кылмыштуу топтун лидерлери тарабынан мыйзамдагы ууру делген «таажы» тагылган.
2011-жылдын июнь айында Обаманын администрациясы Көлбаевди ири чет элдик баңги сатуучу деп тааныган. 2012-жылы АКШнын Каржы министрлиги Көлбаевди “Братский круг” кылмыш синдикатынын мүчөсү деп жарыялаган. 2013-жылы ага Кыргыз Республикасында бир нече кылмыштар, анын ичинде опузалап талап кылуу, адам уурдоо, курал-жарак жана баңги кылмыштары боюнча айып тагылып, бирок пара талап кылуу үчүн үч жылга гана кесилген. 2017-жылы АКШнын Каржы министрлиги Көлбаев мыйзамдагы уурулардын атынан иш алып барган деп билдирген. Ал акыркы жолу 2020-жылы октябрда Бишкекте кылмыштуу уюм түзүп, ага катышкандыгы үчүн камакка алынган.
Сый акы АКШнын Мамлекеттик департаментинин Трансулуттук уюшкан кылмыштуулукка каршы күрөшүү программасы (TOCRP) аркылуу берилет. TOCRP жана Баңгизаттарды мыйзамсыз жүгүртүүгө көмөктөшүү программасы (NRP) аркылуу 1986-жылы түзүлгөндөн бери 75тен ашуун ар кайсы улуттагы кылмышкерлер жана ири баңги сатуучулар сот жообуна тартылышкан. Департамент кармоого алып келген маалымат үчүн 130 миллион доллардан ашык сыйлык төлөгөн.
Бардык маалыматтар WhatsApp, Telegram жана Signal аркылуу билдирүүлөрдү кабыл ала турган +12026430383 номери аркылуу Чет элдик активдерди контролдоо башкармалыгына (OFAC) билдирилиши керек. Жеке адамдар АКШнын жакынкы элчилигине же консулдугуна келип же Kolbayev_Tips@usdoj.gov электрондук дарегине кат жазышса болот. Маалымат берген адамдардын бардыгына купуялуулук сакталат.
Кримтөбөл Камчы Көлбаев 22-октябрда УКМК тарабынан кармалган. Бирок 2-мартта Биринчи Май райондук соту аны эч жакка кетпөө тил каты менен абактан бошоткон эле. Кийинчерээк УКМК Көлбаев ага милдеттендирилген 250 миллион сом чыгымдын 50 миллионун төлөгөнүн расмий түрдө билдирген болчу.
