Экономика жана каржы министри Акылбек Жапаров Евразия экономикалык биримдигине кирген өлкөлөрдүн ортосундагы эсептешүүлөрдө доллардан баш тартууну жактап сүйлөдү. Бул тууралуу ал бүгүн кыргыз-орус бизнес форумунда билдирди.
Анын айтымында, бардык эл аралык жолугушууларда, адатта, залда котормочулары бар кабиналар болот. Бирок бүгүнкү бизнес-форумда андай эмес, анткени тараптар бири-бирин жакшы түшүнүшөт. «Орусия менен Кыргызстанга котормочулар, наушниктердин кереги жок. Анда эмне үчүн соодада доллар деген котормочу пайда болот? Биз Орусиядан көптөн бери суранып келебиз», — деди ал.