Жогорку Кеңештин депутаты Марлен Маматалиев Жарандык кодексине өзгөртүүлөрдү киргизүү демилгесин көтөрдү. Мыйзам долбоору коомдук талкууга чыгарылды.
«Мурасты бөлүштүрүүнүн негизги максаты болуп мураскорлордун адилеттүүлүгүн жана теңдигин камсыз кылуу, эмгекке жарамдуу, жашы жеткен балдарын ата-энелерине камкордук көрүүгө милдеттендирүү. Мураскер мурас калтыруучуну камкордугуна албаса, карылар үйүнө өткөрүп берсе мурастан кур калтыруу каралат. Ошондой эле мурасты бөлүштүрүүдө мураскорлорго мүлктү алардын укуктарына жана талаптарына ылайык бөлүштүрүү, мураскорлордун ортосунда жаралышы мүмкүн болгон чыр-чатактарды жана талаш-тартыштарды болтурбоо, мүлктү так жана адилеттүү бөлүштүрүү саналат»,- деп айтылат маалыматта.
Маалыматка караганда, мурасты бөлүштүрүүдө туугандардын ортосундагы чыр-чатактар көп кездешет. Бул чыр-чатактар ар кандай себептерден улам келип чыгышы мүмкүн, мисалы, мурастын көбүрөөк үлүшүн алуу каалоосу, адилетсиз бөлүштүрүү, туугандарга ишенбөөчүлүк жана башка чыр-чатактын мүмкүн болгон себептери болушу мүмкүн.
«Кыргыздардын салты боюнча ким кары-картаң ата-энесин караса, ага ата-энесинин мүлкү же атына керээз калтырылган адамга берилет. Эгер жок болсо, анда бардыгы кичүү уулуна өтөт. Азыр интеллигенциянын балдары да мурас үчүн соттошууда. Ошондуктан, үй-бүлөлүк мамилелерди жөнгө салуу керек. Ошол себептен сунушталып жаткан мыйзам көпчүлүк элдин укуктарын, кызыкчылыктарын коргоп, талаптарын аткарууга өбөлгө болот»,- деп айтылат маалыматта.