Орусиянын Новосибирск шаарынын райондук соту 27-октябрда кыргызстандык 45 жаштагы аялга карата өкүм чыгарган. Ал уурдоо беренеси менен күнөөлүү деп табылып, 2 жыл 6 айга эркинен ажыратылган.
- Окуя 2021-жылдын 4-ноябрында таңкы саат 7 чамасында орун алган. Кыргызстандык аял адаттагыдай эле жумушка бара жатып, кара сумка таап алган. Полициянын маалыматы боюнча, анда ири суммадагы акча – 7 миллион рубль болгон. Аялдын өзү баштыкта акча болбогонун айткан. Келин 2021-жылдын ноябрь айынан бери камакта болчу.
Өз кезегинде Тышкы иштер министрлиги Айнагүл менен кармалган учурдан бери байланышта болгонун билдирди. Басма сөз кызматынан билдиришкендей, Башкы консулдук анын күйөөсүнө жана адвокаттарына консультациялык жана башка практикалык жардамдарды көрсөтүп келет. Дипломатиялык өкүлчүлүктүн кызматкерлери бардык соттук отурумдарга катышканы да айтылды. Анын жүрүшүндө Башкы консулдук Новосибирск шаарынын райондук сотуна Айнагүлдүн баш коргоо чарасын өзгөртүү өтүнүчү менен кайрылган. Кыргызстандык аялдын камактагы мөөнөтүн узартуу боюнча райондук соттун чечимин Новосибирск облустук сотуна даттанууга да жардам көрсөтүлгөн.
Ошондой эле дипломаттар СИЗО-1де Айнагүл менен жолугуп, өз каражаттарынан тамак-аш жана дары-дармек түрүндө жардам көрсөтүштү. Алар СИЗО-1дин жетекчилиги менен кыргызстандык аялдын камактагы шарттары жана анын депрессияга түшкөн психологиялык абалын эске алуу менен ага кылдат мамиле кылуу боюнча сүйлөшүүлөрдү жүргүзүштү. Учурда Башкы консулдук адвокаттар менен биргеликте Новосибирск облустук сотуна апелляциялык арыз жазуу боюнча иш алып барууда.