«Түтүндүн айынан биз Бишкек эмес, Ышкек болуп калдык», — деп билдирди бүгүн, 12-декабрда депутат Марлен Маматалиев.
Жогорку Кеңештин Агрардык саясат, суу ресурстары, экология жана региондук өнүгүү боюнча комитетинин жыйынында депутат Бишкек шаары кайрадан абанын булганышы боюнча лидер болуп бара жатканын белгилеп, тиешелүү токтомго өзгөртүү киргизүүнү сунуштады.
Ал түтүнгө каршы бир катар чечимдерди киргизүүнү сунуштады – «роза ветров», жашылдандыруу, газификация. «Абанын булганышы рак, астма жана башка ооруларга алып келет. Буга чейин эч кандай изилдөөлөр жүргүзүлгөн эмес, бирок ПРООН жана ЮНИСЕФ аларды жыл бою жүргүзүшкөн жана Жаратылыш ресурстары министрлигинин бир катар жакшы долбоорлору бар. Бирок биз дагы абанын булганышы маселесин чечүүгө салым кошушубуз керек», — деди эл өкүлү.
Жашылдандыруу маселеси боюнча депутат Бишкекте сейил бактар үчүн жайлар буга чейин аныкталганын белгиледи. «Бишкек толуп калган. Андыктан чатырларды жашылдандыруу зарыл. Бул көйгөйлөрдү чечүү үчүн Каржы министрлиги 50 миллион доллар бөлүшү керек», — деди ал. Эл өкүлү кесиптештерин резолюцияны колдоого жана кабыл алууга чакырды.