Чек арадагы чырдан улам Баткенде 11 миңден ашуун адам көчүрүлдү

Чек арадагы чырдан улам Баткенде 11 миңден ашуун адам көчүрүлдү. Бул тууралуу Өзгөчө кырдаалдар министрлигинен маалымдашты.

Баткендеги кырдаалга байланыштуу соңку маалымат боюнча аймактан болжол менен 11 миң 52 адам эвакуацияланды. Алардын 10 миң 410у коопсуз аймактагы үйлөргө көчүрүлсө, 642 адам убактылуу түзүлгөн пункттарга жайгаштырылды. Баткен районунун Орто-Боз, Жака-Өрүк, Үч-Дөбө, Ак-Татыр айыл аймагы, Самаркандек айыл аймагынан Самаркандек, Ак-Сай, Таш-Тумшук айылдарынын болжол менен 6 миңге жакын тургуну Рават айылына убактылуу көчүрүлдү. Лейлек районунун Максат айылынан 400 адам Маргун айылына, Интернационал айылынын 1000дей жараны Кайрагач айылына көчүрүлдү. Мурза-Патча, Сада аймагынан, Ак-Арык жана И.Раззаков айылынын жергиликтүү жашоочулары Исфана, Сүлүктүгө эвакуацияланды. Самаркандек жана Ак-Татыр айылынын 1000дей жашоочусу Лейлек, Кара-Суу, Ак-Теректеги үйлөргө жайгаштырылды.

Азыркы тапта эвакуация болгон жарандар дарыгерлердин көзөмөлүндө болуп, аларга туура түшүндүрүү иштери жүргүзүлүп, зарыл болгон каражаттар менен камсыздандырылды.