Чүйдө төрөттөн кийин 36 жаштагы келин көз жумган. 11-июнда Чүй ОИИБге Чүйдөгү жалпы дарыгерлик практика борборунда чыр-чатактуу кырдаал жаралганы боюнча билдирүү түшкөн.
Милицияга 1984-жылы туулган жаран арыз менен кайрылган. Анын айтымында, 7-июнда 1989-жылы туулган эжеси кош бойлуулуктун 36-жумасында төрөт үйүнө унаа менен жеткирилген. Келин төрөгөн соң, каза болуп калган.
Облустук оорукананын директору Догдурбек Жекшебаевдин 24.кжге берген маалыматына караганда, Чүй районунун тургуну жашаган жеринде каттоодо турган.
«Бизге кош бойлуулугунун 36 жумалыгында келип түшкөн. Дарыгерлер аны көзөмөлдөп, түнү төрөтү башталган. Акушер-гинекологдордун айтымында, аял кесарево операциясынан баш тарткан. Төрөттөн кийин кан кете баштаган. Экспертизанын жыйынтыгында аял геморрагиялык шоктон каза болгон», — деген ал.
Ал белгилегендей, бул аялдын төртүнчү төрөтү болчу. Биринчи ымыркайы өлүү төрөлгөн. Андан кийин эки кыз төрөгөн. Учурда ымыркай өтө оор абалда ооруканада жатат.
