Жогорку Кеңештин депутаттары Жылдыз Таалайбек кызы, Бактыяр Калпаев, Салтанат Аманова, Чолпон Эсенаманова, Жылдыз Эгенбердиева, Махабат Мавлянова, Эдита Тайгараева, Айгүл Ахмедова, Эркеайым Сейтказиева, Нуржамал Торобекова, Нилуфар Алимжанова, Алтынкуль Мурзакимова, Темирлан Айтиев, Абдылдабек Эгембердиев «Учкун» ачык акционердик коомуна барып, анын ишмердиги менен таанышты.
Президенттин иш башкаруучусунун орун басары Бообек Салимжанов, «Учкун» ААКнын башкы директору Бакытбек Султанов депутаттарга өндүрүш жайларды, цехтердин жабдылышын көрсөтүп, өндүрүш процесси жана чыгарылган продукция тууралуу маалымат беришти.
Эл өкүлдөрү алгач күйүүчү майды маркалоо кандай жүзөгө ашырыларына күбө болушту. Андан соң депутаттар окуу китептеринин басмаканасы, мамлекеттик маанидеги ар түрдүү документтерди даярдоо боюнча өндүрүш бөлүмдөрүн кыдырышты. Андан ары депутаттар акциздик маркалардын жасалышы, жалпы жарандык паспорттор жана идентификациялык карталарды даярдоо, айдоочулук күбөлүк, унаалардын техникалык паспортторун чыгаруу процесси менен таанышты.
Президенттин иш башкаруучусунун орун басары атамекендик ишканада масштабдуу модернизация жүргүзүлүп, материалдык-техникалык база жаңыланганын жана заманбап жабдуулар сатылып алынганын белгиледи. Депуттар айдоочулук күбөлүк жана жалпы жарандык паспорттордун даярдалышын ордунан көрүп, коомчулукта пайда болгон ар түрдүү терс пикирлерди четке какты. «Айдоочулук күбөлүктөр Вена конвенциясына ылайык, эл аралык талаптарга толук кандуу жооп берерин көрдүк. Айдоочулуктук күбөлүктүн 34 коргоочу элементи бар экен. Башка өлкөлөрдөн да айдоочулук күбөлүк жасоого буйрутма түшүп жатыптыр», — деди депутат Бактыяр Калпаев.
