Жарандык контроль комитетинен Кемпир-Абадды коргоо комитетинин бир катар мүчөлөрү тинтүүгө жана камакка алынышы тынчсыздандырып жатканын билдиришти.
Кечээ, 22-октябрда Өзгөн шаарында өткөн курултайда 15-октябрында кабыл алынган токтомдун негизинде Кемпир-Абадды коргоо комитети түзүлгөн. Комитеттин курамына бир катар укук коргоочулар, саясатчылар, активисттер жана кызыкдар жарандар кирди. Эртеси, 23-октябрд таң эрте Кемпир-Абадды коргоо комитетинин мүчөлөрү Клара Сооронкулова, Гүлнара Журабаева, Асия Сасыкбаева, Рита Карасартова, Равшан Жээнбеков, Эрлан Жээнчороев, Перизат Суранова, Али Шабдан жана башкалардын батирлеринде жана үйлөрундө укук коргоо органдары массалык тинтүү иштерин жүргүздү. Тинтүү иштери ИИМдин Тергөө кызматынын башчысы кол койгон тинтүү жүргүзүү жөнүндө токтомдун негизинде жүргүзүлгөн. Анда «Кылмыш-жаза кодексинин 36, 278-беренелери боюнча козголгон кылмыш ишинин материалдарын карап чыгып, кылмыш жасоого даярдануу — атап айтканда, кылмыш жасоого даярдануу фактысы боюнча — зордук-зомбулук, өрттөө, мүлктү жок кылуу, ок атуучу куралдарды, жардыргыч заттарды же жардыргыч түзүлүштөрдү колдонуу менен коштолгон массалык баш аламандыктарды уюштуруу же бийлик өкүлүнө куралдуу каршылык көрсөтүү». Тинтүү тергөө судьясынын санкциясысыз жүргүзүлгөн.