Жети-Өгүз районунда курал-жарак сакталган жай табылды. Бул тууралуу УКМКдан билдиришти.
УКМК уюшкан кылмыштуу топтордун мүчөлөрүнө таандык курал-жарактарды жана ок-дарыларды мыйзамсыз жүгүртүүдөн алуу боюнча активдүү иш-чараларды улантууда.
30-мартта УКМКнын Чек ара кызматынын сапёрлор тобунун катышуусу менен жүргүзүлгөн ыкчам-издөө иш-чараларынын натыйжасында, Жети-Өгүз районунун Саруу айылындагы эски сүт-товар фермасынын аймагынан курал жарак сакталган жашыруун жер аныкталып, андан “РГД-5” үлгүсүндөгү 2 кол гранатасы, 2 даана чет өлкөлүк жарык-үн чыгаруучу граната, 4 түтүн бомбасы, 7,62х54 калибрдеги снайпердик курал үчүн 16 патрон жана 5,45х39 калибрдеги Калашников автоматы үчүн 42 патрон табылган.
Мындан улам, аталган факты боюнча курал-жарактарды жана ок-дарыларды мыйзамсыз жүгүртүүгө тиешеси бар адамдарды аныктоо жана аларды жоопкерчиликке тартуу боюнча иликтөө иштери башталды.