Милициянын кайгуул кызматы жол тескөөчүнү муунтуп, колун көрсөткөн айдоочу менен жүргүнчүнүн видеосун жарыялаган.
Буга чейин социалдык тармактарда милиция кызматкерлери айдоочуну жерге басып жаткырып кармаган видео тараган. Кайгуул кызматы пикир келишпестик эмнеден башталганы тууралуу видео жарыялады. Ленин РИИБ маалымат берип, аталган факты каттоого алынганын, териштирүү башталганын билдирген.
Милициянын кайгуул кызматы маалымат берип, айдоочу Ленин РИИБге жеткирилгенин билдирди.
«1-апрелде саат 13:10 чамасында жол тескөөчүлөр Toyota Alphard унаасын токтоткон. Бирок ал мыйзамга баш ийбей, качып кеткен. Унаанын артынан түшүп, токтотушкан. 1990-жылы туулган айдоочу каршылык көрсөтүп, сөгүп, кызматкерлерге карата күч колдонгон. Акырында айдоочу кармалып, Ленин РИИБге жеткирилген. Унаа айып короого киргизилген. Факты каттоого алынып, териштирүү башталды»,- деп айтылат маалыматта.
