Чүй облусунун Жайыл районундагы Көкөмерен дарыясына балык уулоого чыгып кеткен бойдон дайынсыз болуп жаткан 28 жаштагы жарандын сөөгүн издөө иштерин улантууга бүгүн, 22-майда 8 куткаруучу, 1 дрон тартылды. Бул тууралуу ӨКМден билдиришти.
19-майда саат 19:00 чамасында 1997-жылы туулган жаран Көкөмерен дарыясына балык уулоого чыгып кеткен бойдон кайткан эмес. Кайырмагы суунун жээгинен табылып, өзү дайынсыз болуп жаткандыгы тууралуу маалымат “112” кызматына түшкөн.
Кечээ, 21-май күнү ИИМдин өтүнүчүнүн негизинде жерине издөө иш-чараларын жүргүзүүгө ӨКМден 10 куткаруучу, ИИМден 12 кызматкер, жергиликтүү тургундардан 23 адам, жалпы 45 адам тартылып издешти. Кеч киргендигине байланыштуу саат 19:45те издөө иштери убактылуу токтотулган.