Өткөн жылдын февраль айында милиция маалымат таратып, Токтогулда ымыркайдын колу чыканагынан ылдый кесилгенин, иш боюнча дарыгерлер сурак бергенин билдирген.
- Токтогул районунун 25 жаштагы тургуну 2023-жылдын 24-февраль күнү Токтогул райондук прокуратурага арыз менен кайрылып, ал 2023-жылы туулган баласы денесине ар түрдүү нерселер чыгып дене табы көтөрүлгөндүктөн, Токтогул райондук оорукананын кайра жандандыруу бөлүмүнө кайрылгандыгын айтып берген. Ооруканада дарыгерлер уулунун колуна туура эмес укол сайышып, анын кесепетинен Бишкек шаарындагы балдар ооруканасында оң колун чыканактан ылдый жагы кесилип, ампутация болгондугун билдирип, Токтогул райондук оорукананын окуяга тиешеси бар дарыгерлерди мыйзам чегинде жоопко тартып берүүнү суранган.
Бүгүн, 29-январда СЕРЕП МЕДИА маалымат агенттигини окуяга дээрлик 1 жыл болгонуна байланыштуу наристенин апасы менен байланышып, уулунан кабар алдык. «Абалы мурдагыдай эле болуп жатат. 3 күн болду ооруканадагы реанимациядан үйгө чыктык. Азыр уулум өзү тамак жей албайт. Зонд менен тамак беребиз. Менин башыма түшкөндү башкаларга каалабайм. Акыркы убакта ооруканага баттан каттап калдык. Ал эми соттук иш алдыга жылган жок. Сот чечими чыга элек. Отурум 8 жолу жылды. Буга дарыгерлердин кошумча экспертизага бергени себеп болду. Балам, өзүм да ооруп жаткандыктан соттук иштерге убактым болбой жатат», — деди ал.
Байланышууну каалагандар үчүн номур: 0508 099 737.