Калк арасында темир жол менен жүргүнчүлөрдү ташууну жайылтуу жана өлкөнүн туристтик тармагын өнүктүрүү максатында Бишкек-1 вагонду оңдоо заводунда эсептен чыгарылууга жаткан 070 30005 вагону эксперименталдык жүргүнчү вагонуна модернизацияланды. Алдын ала вагондун конструкцияларын андан ары пайдалануу боюнча толук изилдөө жүргүзүлгөн. Вагондун дизайнын өзгөртпөстөн, коопсуздукту камсыз кылуу үчүн техникалык документтердин талаптарына ылайык вагондун дизайнын бузбастан кузовду күчөтүшкөн.
Модернизациялоодо вагондун ички интерьери гана өзгөртүлдү. Жүргүнчүлөрдүн ыңгайлуулугу үчүн терезелери чоңойтулуп, панорамалык терезелер орнотулду. Кыймылдын коопсуздугун камсыз кылган жүрүүчү бөлүктөрүнүн жана автотоктоткучтардын жаңы элементтери орнотулду. Сапардын ыңгайлуулугу үчүн кыш-жай абаны кондиционерлөө системалары орнотулган, ошондой эле муздаткыч жана муздак ичүүчү суу орнотулган. Жолдо жүрүүдө жүргүнчү жаңы толук экрандуу сыналгылардын стереосунун сапатын баалай алат. Вагонду модернизациялоо ишкананын күчү менен, тышкы инвестицияларды тартпастан жүргүзүлдү.
