“Ысык-Көл айланма жолунун 104-184,5-чакырымдар аралыгын (Корумду-Балбай-Баатыр тилкеси) реконструкциялоо” долбоору боюнча курулуш иштери башталды. Ага Министрлер кабинетинин төрагасы Акылбек Жапаров, Транспорт министри Тилек Текебаев, Кытайдын Кыргызстандагы элчиси Ду Дэвэнь жана башка кызматкерлер менен жергиликтүү тургундар катышты.
Курулуш мөөнөтү 2024-2027-жылдарга белгиленген унаа жол төрт тилкелүү болуп, тротуар, велосипед жолу менен 14 көпүрөнүн жана 877 суу өткөргүчтөрдүн курулушу менен реконструкциялоо жумуштары каралган. Ошондой эле, долбоордун алкагында жарыктандыруу, калктуу конуштарда аялдамалар, темир бетон парапеттер, тосмолор орнотулуп, эс алуу зонасы бар унаа токтотуучу жайлар курулат. Мындан тышкары, долбоордо жолду жашылдандыруу да каралган. Алдыда кыйылган бак-дарактардын ордуна 1:3 катышта жаңылары отургузулмакчы.
