Кыргызстандын медициналык окуу жайлары Пакистандын кара тизмесинен чыгат. Маселе министр Алмазбек Бейшеналиевдин Пакистанга болгон иш сапары жана Медицина комиссиясынын президенти Ардаш Таки менен жолугушкандан кийин чечилген.
Кыргызстандын окуу жайлары төмөндөгүдөй тизмеге кирди:
- А — эл аралык, көз карандысыз аккредитациядан өткөн окуу жайлары;
- В — көз карандысыз аккредитациядан өтүп, бирок эл аралык аккредитациядан өтпөгөн окуу жайлар;
- С — аккредитацияланбаган жана жаңы ачылган медициналык окуу жайлар.
Жакында эле ачылган медициналык окуу жайлар өзүнчө тизмеге киргизилмей болду.
Өткөн жылдын 29-октябрында Кыргызстандын медиктерди даярдаган окуу жайлары Пакистандын «кара тизмесине» киргени маалым болгон. Буга тийиштүү ЖОЖдордун бүтүрүүчүлөрүнүн 90 пайызы Пакистандын медицина кеңешинде милдеттүү экзамендерди тапшыра албай калышы жана дипломдорунун жараксыз болушу себеп экени айтылган. Андан кийин төрт окуу жай «кара тизмеден» кайра чыгарылган эле.