Кыргызстанда кумшекер менен өсүмдүк майынын кымбатташына түшүмдүүлүктүн төмөндөшү себеп болгон. Бул тууралуу Айыл, суу чарба жана аймактарды өнүктүрүү министрлигинин маалымат кызматы билдирди.
Кумшекер
2020-жылы кант кызылчасын айдоо жеринин аянты 8,4 миң гектарды түзгөн. Бул 2019-жылга салыштырмалуу алты миң гектарга аз. Жалпысынан 448,8 миң тонна кант кызылчасы жыйналып, түшүмдүүлүк гектарынан 533,9 центнерди түзгөн. Бул көрсөткүч 2019-жылга салыштырганда 292,4 миң тоннага төмөн.
«Кант кызылчасынын айдоо аянтынын кыскарып кетишине «Кайыңды Кант» жана «Кошой» ишканалары аталган азыкка болгон бааны арзандатып коюшканы себеп болгон. Мындан тышкары, кумшекер чыгаруучу заводдордун келишимди бузуусу жана аба ырайындагы өзгөрүүлөр таасир эткен», — деп айтылат маалыматта.
Жыйынтыгында заводдор былтыр 56,6 миң тонна кумшекер өндүргөн. 2020-жылы 17,1 тонна кумшекер сырттан сатып алынган.
Өсүмдүк майы
2020-жылы май алынуучу өсүмдүктөр 19,6 миң гектар аянтка себилген. Бул 2019-жылга салыштырганда 6,4 миң гектарга аз болгон. Андан 23,9 миң тонна түшүм жыйналган. Деген менен ал 2019-жылга караганда 7,3 тоннага төмөн.
«Кыргызстан ЕАЭБге киргенден кийин сырттан арзан өсүмдүк май азыктары алына баштады. Ошондуктан май алынуучу өсүмдүктөрдүн айдоо аянты жыл сайын кыскарып жатат. Мындан сырткары, өлкөдө өндүрүлгөн өсүмдүк майынын өздүк баасы жогору жана ага кеткен чыгым көп болгону да буга бир себеп«, — деп айтылат министрликтин билдирүүсүндө.
2020-жылы 7,1 миң тонна өсүмдүк майы өндүрүлгөн. Өткөн жылы 39,5 миң тонна азык сырттан сатып алынган. Анын ичинен Казакстандан 6,4 миң тонна жана Россиядан 32,7 миң тонна келген.
Ушул жылдын январь айында өлкөдө 0,553 миң тонна өсүмдүк майы өндүрүлгөн. Акыркы эки айда 5,7 миң тонна азык импорттолгон.
Министрлик аталган азык Кыргызстанга негизинен Казакстан жана Россиядан алынарын белгиледи. Өсүмдүк майына болгон баанын жогорулап кетиши аталган өлкөлөрдөгү түшүмдүүлүктүн төмөндөөсү менен шартталат.