26-декабрда Билим берүү жана илим министри Догдуркүл Кендирбаева дүйнөдөгү мыкты деп таанылган 5 ЖОЖдун бири Стэнфорд университетине тапшырган Нуркыз Ыдырысова менен жолугушту.
Нуркыз Ыдырысова Стэнфорд университетинин бакалавриатына тапшырган алгачкы кыргызстандык студент болуп саналат. Ал техникалык багытта билим алууну көздөп, ракета жана космостук объектилерди куруу боюнча инженер адистигин тандап алган.
Нуркыз Ыдырысова Бишкек шаарындагы №9 мектеп-гимназиясында окуган, учурда Bishkek International School мектебинде билим алууда. Ал Стэнфорд университетинде гранттык негизде 4 жыл окуйт жана окуу акысы 336 миң долларды түзөт.