Жогорку Кеңештин Социалдык саясат боюнча комитетинин отурумунда Бишкектеги тиш доктурда чарчап калган 3 жашар кыздын ишин иликтөө боюнча Саламаттыкты сактоо министрлигинин маалыматын укту.
Бул багытта министрликте түзүлгөн комиссиянын төрагасы, Саламаттык сактоо министринин кеңешчиси Ринат Мавланбай уулу маалымат берди. Ал окуяга байланыштуу укук коргоо органдары тарабынан тергөө иштери жүрүп жатканын белгиледи.
Комитет төрайымы Винера Раимбачаева менчик клиникаларды текшерүү маселесине токтолуп, министрликтин бул багыттагы иш-аракеттерин тактады. Ринат Мавланбай уулу окуя орун алган менчик клиника убактылуу жабылып, учурда териштирүү иштери жүрүп жатканын кошумчалады. Депутат Аида Исатбек кызы менчик клиникаларды текшерүү иштеринин жыйынтыгын сурады. Саламаттыкты сактоо министрлигинин өкүлү 2023-жылдын ноябрь, декабрь айларында Бишкек, Ош шаарларында жана Чүй облусунда текшерүү жүргүзүлгөндүгүн белгиледи. Тактап айтканда, 626 ишкерлер текшерилип, алардын 410унда лицензиясы болсо, калгандарына жок болуп чыккан. Анын натыйжасында 251 ишкерге 1,5 миллион сом айып пул салынган. Депутат Максатбек Сарбагышев окуянын орун алганына бир ай убакыт өтсө да териштирүү иштери жыйынтыкталбагына көңүл буруп, кылмыш ишине тиешелүү дарыгерлер жоопкерчиликке тартылуусун айтты.