«Ишеним» фракциясынын лидери Улугбек Ормонов Өзгөн районундагы Төрт-Көл, Ийри-Суу жана Жазы айыл аймактарына барып, тургундар менен жолугушууларды өткөрдү. Эл өкүлү алгач Төрт-Көл айыл аймагындагы Шоро-Башат айылынын тургундары менен жолугуп, аймактагы социалдык-экономикалык маселелер, жазгы талаа иштерине болгон даярдыктар жана социалдык объектилердин абалы тууралуу пикир алышты. Бул тууралуу Жогорку Кеңештин басма сөз кызматынан маалымдашты.
Анда жергиликтүүлөр эң актуалдуу көйгөйлөрдүн бири катары мыйзамсыз курулуштардын бузулушун белгилеп, «СНОС» делген иш-аракеттер карапайым элдин мүлкүнө залакасы тийип жатканын айтышты. Аталган маселе боюнча кеңири түшүндүрмө берген депутат: «Республикалык жолдорду камтыган көчөлөрдөгү мыйзамсыз курулуштар бузулууга тийиш. Ал эми мыйзамдуу курулуштардын ээлерине мамлекет тарабынан кенемте төлөнүп, башка аймактан жер тилкесин сатып алууга шарт түзүлөт. Ошондой эле ички жолдордун жээгиндеги үйлөрдү жана курулуштарды бузууда өз билемдикке салган жетекчилер жоопко тартылат. Эч кимдин жеке мүлкү мыйзамсыз тартып алынбашы керек», — деди.
Жылалды айылында да тургундар жол жээктеги үйлөрдүн бузулуп жатканын ортого салып, бул маселени оң жакка чечип берүүнү өтүнүштү. Ошондой эле Өзгөн райондук ооруканасынын учурдагы абалы сүйлөшүлүп, бул боюнча Министрлер кабинетине кат жолдонгону маалым болду. Депутат Улугбек Ормонов маанилүү делген Өзгөн – Мырза-Аке – Кара-Кулжа жолун оңдоп-түзөө үчүн Турукташтыруу фондунан каражат бөлүнүп, жумуштар жакында башталарын баса белгиледи.