Интернетте президент Садыр Жапаровдун, мурдагы президент Сооронбай Жээнбековдун үнүн окшоштуруп туурап, көпчүлүктү таң калтырган жигиттин видеосун көргөндүрсүз? Биз дал ошол жигит менен таанышып, дагы башка өнөрлөрү менен тааныштык.
«Бул видео «случайно» тартылып калган. Бишкектеги соода борборлордун биринде балмуздак жейин деп жүрсөм, дос бала көрүп калып, телефонун алып чыгып, «Садыр Жапаровду, Камчыбек Ташиевди туурап койбойсуңбу» деп калды. Капыстан тартылган видео болчу. Ошондой эле досумдун тоюндагы видео да тарап кеткен. Жарыя болуп, тарап кетет деген деле үмүт жок болчу. Бул талантым университетте окуп жүргөндө эле башталган. Окутуучуларды туурачумун. Бири жаман көрсө, бири жакшы көрөт эле. Аял кишилердин да үнүн туурай алам. Бирөөнү деле карап, анын үнүн жаздырып алып, даярданмай деген жок. Бул шак эле кетет. Үй-бүлөмдө апам туурайт. Баарын туурайт. Апамдан жуккан окшойт»,- деди ал.
