Бишкек травматология жана ортопедия илимий изилдөө борбору кайра түзүлөт. Бул тууралуу журналисттерге саламаттыкты сактоо министри Алымкадыр Бейшеналиев билдирди.
Министрдин айтымында, аталган борбор Шаардык клиникалык тез жардам ооруканасы болуп кайра түзүлөт. Чечим борбордун мэриясы менен макулдашылгандан кийин кабыл алынат. «Ошол эле учурда директорлук кызмат жоюлат, башкы дарыгер Саламаттыкты сактоо министрлиги тарабынан дайындалат. Азырынча талапкер жок, бирок жакшы жигит башкарат. Жакынкы арада Улуттук госпиталда травматология бөлүмүн ачабыз. Борбордун айрым бөлүмдөрү трансформацияланууда, бул медициналык тейлөөнүн сапатына эч кандай таасир этпейт», — деди ал.
Бишкек травматология жана ортопедия илимий изилдөө борборунун директору Сабырбек Жумабеков оорукананын кайра түзүлүшү боюнча маалыматка комментарий берди. Ал учурда эмгек өргүүдө экенин белгиледи. «1-февралда эртең менен саат 8де министр борборго келип, кызматкерлер менен жолугушту. Жыйындын жүрүшүндө ар кандай куру сөздөрүн айтты. Бул жыйында ал борборду пландаштырып жаткан кайра уюштуруу тууралуу сөз кылган жок. Ошондон кийин борбор жоюлуп жатканын өзүбүз билдик», — деди ал. Өз кезегинде Жумабеков кайра уюштуруу аны кызматтан алуу үчүн жүрүп жатат деп эсептейт. «Мунун баары мени кетирүү үчүн жасалып жатат. Негизинен кайра куруу туура эмес деп эсептейм, анткени ал жылдар бою курулганды талкалайт. Бул жылдар аралыгында биз ортопедия дүйнөсүнө эмгегибиз менен салым коштук», — деди ал.
Буга чейин министрлик аталган борбор Бишкек шаардык мэриясы, шаардык кеңеш жана Саламаттыкты сактоо министрлигинин үч тараптуу келишиминин негизинде иш жүргүзүп келери айтылган.