Саясатчы Жеңиш Молдокматов кармалды. Бул тууралуу анын тарапташтары соцтармактагы баракчалары аркылуу билдиришти. Анда саясатчынын укук коргоо кызматкерлеринин коштоосунда унаага отуруп бара жатканы жана анын «сынбагыла, баары жакшы болот, кийим-кечемди берип койгула, үй-бүлөмө да айтып койгула» дегенин угууга болот.
Жактоочусу: «Бүгүн, 6-майда саат 10до суракка чакырылган, кийин түштөн кийин да чакырылды. Сурак бүткөндөн кийин ага 245-берене менен айып коюлду. Анда Улуттук коопсуздук кызматын басып алууга аракет кылган дегендин негизинде камакка алынды. Азыр ИВСке алып кетишти», — деди.
Түшкө чейинки сурактан чыккандан кийин Жеңиш Молдокматовго СЕРЕП МЕДИА маалымат агенттигинен байланышканда «Октябрь айындагы окуялар боюнча Садыр Жапаров менен Камчыбек Ташиев да суралышы керек» деген эле.
«Замандаш» партиясынын экс-лидери, «Ханституцияга каршы» борборунун демилгечиси, учурда «Туран» партиясынын лидери буга чейин жаңы Баш мыйзамга каршы митингдерди уюштуруп келгени маалым.
