Жогорку Кеңештин төрагасы Нурланбек Шакиев баштаган делегация Азербайжандын борбор калаасы Баку шаарындагы улуу кыргыз жазуучусу Чыңгыз Айтматовдун эстелигине гүл коюп, залкар калемгерди эскеришти.
Эки өлкө ортосундагы бир туугандыктын, достуктун жана биримдиктин символу катары Чыңгыз Айтматовдун элеси түшүрүлгөн эстелик президент Садыр Жапаровдун Азербайжандагы мамлекеттик сапары учурунда ачылган. Ага Азербайжандын президенти Ильхам Алиев да катышкан. Эки өлкө башчылары маданий байланыштардын маанилүүлүгүн белгилешип, Кыргызстан менен Азербайжандын ортосундагы достукту чыңдоодо Чыңгыз Айтматовдун ролу чоң болгонун билдиришкен. Алсак, Баку шаарынын борборундагы паркта жайгашкан эстелик азербайжан скульптору Натиг Алиев тарабынан жасалган.
