SuperTV телеканалынын журналистинин парламенттик аккредитациясынын алынышы эрежеге туура келбейт. Бул тууралуу «ПолитКлиника» медиасы фактчекинг жүргүзүп, макала жарыялады. Анда аталган басылма журналисттер кандай учурда аккредитациядан ажыратыларын жана токтотула турганын карап көрдү.
Журналист аккредитациядан ажыратуу боюнча эреже бузган эмес
Жалпыга маалымдоо каражаттарынын журналисттерин Жогорку Кеңешке аккредитациялоо жөнүндө эрежеде төмөндөгүлөй жазылган.
Жогорудагы жобого ылайык, атайын комиссия ЖМК өкүлдөрүн эреже бузган учурда аккредитациядан ажыратууга укуктуу.
- журналист тарабынан Жогорку Кеңештин иштиктүү кадыр-баркын, депутаттардын, кызматкерлердин ар-намысын жана абийирин кемсинткен чындыкка дал келбеген маалыматтарды жайылтылганда;
- парламенттин иш-чараларынын жүрүшүндө коомдук тартип жана жүрүм-турум ченемдери бир нече жолу бузулганда;
- аккредитация боюнча ырастамасы бир нече жолу жоготулганда аккредитациясынан ажыратылат.
Бул эрежеге ылайык, SuperTV телеканалынын кызматкери тарабынан эреже бузуулар болгон эмес.
Жыйынтык: Журналисттерди Жогорку Кеңешке аккредиттөө жөнүндө эрежесине ылайык, SuperTV телеканалынын кызматкери тарабынан тартип бузуу болгон эмес.
Кечээ, 18-майда SuperTV телеканалынын журналистине журналисттик милдетин аткаруу үчүн Жогорку Кеңешке кирүүгө тыюу салынган болчу. Бүгүн, 19-майда да SuperTV телеканалынын журналисти Жогорку Кеңешке киргизилген жок.