Министрлер кабинетинин төрагасы Акылбек Жапаров Жалал-Абад облусунун Сузак районунда унаа сүзүп кеткен балдардан кабар алды. Жабыр тарткан 10 бала Бишкек шаардык клиникалык тез жардам ооруканасына жаткырылган.
Акылбек Жапаровго балдардын абалы жана аларды дарылоонун мындан аркы планы айтылды. Маалым болгондой 4 бала реанимацияга, 6 бала травматология бөлүмүнө жаткырылган. Балдарды текшергенден кийин хирургиялык кийлигишүү жөнүндө чечим кабыл алынат.
Жабыркаган балдардын жакындары менен баарлашкан Акылбек Жапаров аларга колдоо сөздөрүн айтып, балдар сапаттуу дарыланып, күнү-түнү дарыгерлердин көзөмөлүндө болорун билдирди.
