Ички иштер министрлиги таксисттерди лицензия алууга милдеттендирүүнү көздөөдө. Бул тууралуу Жогорку Кеңештин Мыйзамдуулук, укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынында министрдин орун басары Октябрь Урмамбетов билдирди.
Анын айтымында, лицензия алуу үчүн бир нече эрежелерди сактоо керек: айдоочунун үч жылдык айдоо тажрыйбасы болушу керек; айдоочу техникалык текшерүүдөн өтүшү керек; айдоочунун патенти, камсыздандыруусу жана Соцфондго чегерүү болушу керек.
«Бул шарттар аткарылгандан кийин гана таксист бир жылга лицензия алат. Аны кайрып алуу мүмкүн эмес. Эгерде лицензиясы жок адам иштесе, анда жеке адам 7500 сом, юридикалык жактар 3000 сом төлөйт. Эгерде мыйзам бузуулар болсо, жеке тарапка 5500 сом, юридикалык жактарга 17000 сом айып салынат. Лицензия жеке тарапка 500 сом, фирмаларга 1000 сом болот», — деди ал.
Министрдин орун басарынын айтымында, оң рулдуу таксилерге лицензия берилбейт.