Президент дал ушул жерге 2021-жылдын август айында келип, “мезгил кутусун” салуу менен ГЭСтин курулушу башталганын эске салды. Ошондо көп эксперттер мындай ГЭСти 3 жылдын ичинде куруп бүтүрсө болот деп боолголошкон эле. “Биз “Бала-Саруу” ГЭСин долбоорлоо маселесин камтуу менен бирге 3 жылга жетпеген мезгил аралыгында куруп бүткөрүүгө жетиштик. “Бала-Саруу” ГЭСи — Кыргызстандын эгемендик жылдарындагы чакан ГЭС куруу боюнча жүзөгө ашырылган алгачкы мамлекеттик долбоор. Бул долбоор мамлекет тарабынан электр кубатын өндүрүү тармагын өнүктүрүү үчүн жаңы мүмкүнчүлүктөрдү ачат, мамлекетибиздин экономикасын өнүктүрүүгө оң таасирин тийгизет. Элибизге да, эл аралык коомчулукка да бийликтин ишенимин арттырат”, — деди президент.
Ал ошондой эле мурда мамлекеттик объектилерди куруу үчүн көп долбоорлорго эл аралык донорлордон насыяга каражат алып, ошол эле учурда аларды чет элдик ишканалар куруп келишкенин белгиледи. Садыр Жапаров “Бала-Саруу” ГЭСин куруу үчүн техникалык-экономикалык негиздемени Энергетика министрлигине караштуу илим-изилдөө институту учурдун талабына дал келтирип кайра иштеп чыкканын, ал эми курулуш иштерин ата мекендик ишканалар алпарганын белгилей кетти.
“Бала-Саруу” ГЭСине жалпы жонунан 2,8 миллиард сом жумшалды, анын ичинде Кыргыз-Орус өнүктүрүү фондунун салымы да бар. Бул суммага гидроэлектростанциянын имаратынын курулушу, 110 кВ жабык бөлүштүрүүчү түзүлүштө жабдууларды монтаждоо, эки күч трансформаторун орнотуу жана узундугу 6,7 чакырым болгон “Бала-Саруу” — Кара-Арча жана “Бала-Саруу” — Покровка электр берүү чубалгыларын куруу иштери жүргүзүлгөн.