Президент Садыр Жапаров кол койгон жарлыкка ылайык, маркум Орозмамат Акуналиев менен Дилмурат Шамшиев III даражадагы “Эрдик” ордени менен сыйланды.
2023-жылдын 27-октябрында саат 15:30 чамасында май ташуучу унаа Бишкек-Ош унаа жолунун 96-чакырымында кулап кетип, өрттөнүп баштаган. Иш сапары менен жолдон өтүп бара жаткан Хонда-СРВ үлгүсүндөгү унаадагы 30 жаштагы Кызыл-Кыя ШИИБдин тергөөчүсү милициянын капитаны Орозмамат Акуналиев менен 41 жаштагы Кызыл-Кыя ШИИБдин кылмыш иликтөө бөлүмүнүн ыкчам кызматкери милициянын майору Дилмурат Шамшиев бензовоздун айдоочусун өрттөн куткаруу үчүн токтоп, жардам бергенде алар дагы өрттөн жабыркап, ооруканага жеткирилген. Тилекке каршы, алган жаракаттарынан улам экөө тең көз жумган.